అనగనగా అమెరికా-18(కిం కం)

కామేశ్వరి పిన్ని అమెరికా వచ్చి 30 సంవత్సరాలయ్యింది.

ఇండియన్స్ తప్ప మిగతా వాళ్లందరకూ ఆవిడ “కిం”గానే  పరిచయం.

వరసకి బీరకాయ పీచు పిన్ని అవుతుంది నాకు. ఈ మధ్యనో అమెరికన్ పార్టీలో కలిసాం. ఎప్పుడో చిన్నప్పుడు చూసేను. ఎంతో జాగ్రత్తగా మేకప్ చేసుకున్నా ముఖంలోని ముడతలు, ఎముకలు పైకి పొడుచుకొచ్చిన దవడలు ఆవిడ వయసు తెలుపుతున్నాయి. వేషభాషల్లో అమెరికన్లకు తీసిపోకుండా ఉంది. “అదేంటి పిన్నీ, మిమ్మల్ని “కిం” అని పిలుస్తున్నారు వీళ్లంతా” అన్నాను ఉండబట్టలేక.

“వీళ్లకి నోరు తిరగని పేర్లు అపభ్రంశంగా పిలిపించుకోవడమెందుకు? చైనీ వాళ్లు చూడు అమెరికన్ నేమని ప్రత్యేకంగా మరోటి పెట్టుకుంటారు.” అంది.

అప్పట్లో ఈవిడ పదో తరగతి వరకే చదివిందనీ, ఇంజనీరు సంబంధం కుదరడం వల్ల అమెరికాలో సెటిలయ్యిందనీ విన్నాను. చూస్తే అనర్గళంగా మాట్లాడుతూంది ఇంగ్లీషులో.

“అబ్బా, పిన్నీ ఎంత బాగా ఇంగ్లీషు మాట్లాడుతున్నావు!” అన్నాను ప్రశంసా పూర్వకంగా.

“మరేమనుకున్నావు, అమెరికాలో నిలదొక్కుకోవాలంటే ఈ మాత్రం తప్పదు. ఇక్కడ టీచరుగా పనిచెయ్యడం కోసం యూనివర్శిటీలో డిగ్రీ చదువుకున్నాను. ఇలా వీళ్లలా మాట్లాడడం అతి కష్టమ్మీద నేర్చుకున్నాను. వీళ్లని ఇంగ్లీషులో అధిగమించాలంటే ఎంతో కష్టపడాలి. కాంపిటీషన్‌లో నెగ్గుకు రావడం అంత సులభం కాదు” అంది.

ఈవిడ పెళ్లయిన కొత్తలో అత్తారింటికి వెళ్లొచ్చిన మరుసటి నెలలోనే స్టైలిష్‌గా మాట్లాడుతుండేదని అమ్మమ్మ చెప్తూండేది. ఈవిడ స్టైల్‌ని అంతా అపార్థం చేసుకున్నారన్నమాట. ఎక్కడికి వెళ్లినా ఆ సంస్కృతిని ఎడాఫ్ట్ చేసుకుని, అందులో నిలదొక్కుకుని పైకి రావడానికి పిన్ని చేసిన ప్రయత్నాన్ని అభినందించాలి అనుకున్నాను.

ఆ వారాంతం మా ఇంట్లో నాకు తెల్సిన పది ఇండియన్ ఫామిలీస్‌ని పిలిచి ఆవిడకి సర్‌ప్రైజ్ సన్మాన కార్యక్రమం ఏర్పాటు చేశాను.

“కిం కం కామేశ్వరి పిన్ని” ఇంగ్లీషు దంచేస్తుందని అందరికీ తెలుసు. భోజనాల దగ్గిర మేమంతా ఇంగ్లీషులోనే మాట్లాడుకుంటూంటే “మేమంటే 30 ఏళ్ల కిందటొచ్చి ఇక్కడి సమాజంలో కలవడానికి మరో మార్గం లేక ఇలా తగలడ్డాం. ఇప్పుడు ఇంతమంది తెలుగువాళ్లు ఉన్నారుగా మన చుట్టూ. ఉద్యోగాలలో ఎలాగూ ఇంగ్లీషు మాట్లాడుకోక తప్పదు. ఇక్కడైనా ఇంచక్కా తెలుగులో మాట్లాడండర్రా. ఏదో పేరంటే ఇక్కడి వాళ్లకు సులువుగా ఉంటుందని పెట్టుకున్నా కానీ, మనసు మారలేదర్రా – నేను కామేశ్వరినే”  అంది పిన్ని.

ఇంగ్లీషులో మాట్లాడుకుంటేనే గొప్ప అని ఇండియాలో అంతా ఫీలయ్యే కుటుంబాల నించి వచ్చిన మేం “కిం కం” లేకుండా నోళ్లు వెళ్లబెట్టేం.

……………..

– డా|| కె.గీత

http://www.andhraprabha.com/columns/gita-madhavi-article-about-english-in-telugu-families/10255.html

First Published: 17 Jan 2014

ప్రకటనలు
This entry was posted in అనగనగా అమెరికా(ఆంధ్ర ప్రభ కాలం) and tagged . Bookmark the permalink.

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు / మార్చు )

ట్విటర్ చిత్రం

You are commenting using your Twitter account. నిష్క్రమించు / మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు / మార్చు )

గూగుల్+ చిత్రం

You are commenting using your Google+ account. నిష్క్రమించు / మార్చు )

Connecting to %s