జార్జ్ ఫ్లాయిడ్!
నీ చివరి శ్వాస
ఊపిరాడనివ్వడం లేదు
మొన్నటిదాకా
నువెవ్వరివో-
ఇవేళ మాత్రం నువ్వు
అణిగణిగి
పెల్లుబికిన ప్రజాలావావి
పెళపెళమని
విరుచుకుపడ్డ జనాకాశానివి
పీకె మీద కాలు
నీ గొంతులో గుచ్చుకుంటున్న దృశ్యం
అనామకంగా ఇంకనివ్వకుండా
చరిత్రనేల విచ్చిన
మహోగ్ర మానవగర్జనవి
నినాదాలు మండేనాలుకలై ఎగిసిన
మానుష బడబానలానివి
నువ్విపుడు
ఒక్కో కన్నీటి చుక్కా పోగై
జాత్యహంకారాన్ని తోసుకువస్తున్న
ప్రభం”జన” చెలియలికట్టవి
జార్జ్ ఫ్లాయిడ్!
నీ చివరి శ్వాస
ప్రళయంలా
ఎవరికీ ఊపిరాడనివ్వడం లేదు
నీ మరణ పోరాటమ్మీద
కొరడా ఝళిపిస్తున్న
శ్వేత సౌధంతో సహా!