పెనవేసుకున్న బంధం
ఒక్కటి
తంత్రి తెగిపడ్డట్టు
రాలిపోయింది
నిశ్శబ్దంగా
కాలంలో
ప్రవహిస్తున్న
నును వెచ్చని నీరు-
నన్ను నేను ఓదార్చుకోలేక
విహ్వలంగా
వేళ్ల చివర వేళ్లాడే
ద్రవ హృదయం
చాటున
కరడు కట్టి
మూలిగే వేదన
ఎలా తీరుతుంది?
ఎన్ని రాత్రుళ్లు
రోదించినా
వెనుచూడని
విహంగంలా
వెళ్ళిపోయిన
ప్రాణం
దాపున
జ్ఞాపకాలు
వర్తమానమై
మిగిలిన
బహుమానం-
పొద్దు గుంకినప్పటి
వెలుతురు కిరణాల్లా
నిశ్శబ్ద సహజంగా
అందరూ
ఒక్కొక్కరుగా
తెలీకుండానే
రాలిపోవలసిందేనని
తెలిసినా
కరడు కట్టని
జీవితమే
గొప్ప అనుభూతిగా
పెనవేసుకున్న స్నేహం
ఏ అర్థరాత్రో
కుదిపినప్పుడు
తనని తను
ఓదార్చుకోలేక
నిస్సహాయంగా
కళ్లని వేళ్లాడే
ద్రవ హృదయం
ఎప్పటికి తెప్పరిల్లుతుంది?
*****
(అత్యంత ఆత్మీయులు పుట్ల హేమలత గార్కి నివాళిగా-)
(విహంగ, మార్చి 2019 ప్రచురణ)