ఉగాది పండగ నాడు
ఉదయానే నిద్ర లేచానా
పక్షుల కిలకిలా రావాలతో తెల్లారింది
ట్వీట్ ట్వీట్ కీచ్ కీచ్…….
అయ్యో అలెక్సా
బర్డ్ సౌండ్స్ అంటే
ట్వీట్ ట్వీట్ కీచ్ కీచ్…….
కాదమ్మా…
కమ్మని కోయిల కూత-
నీ దగ్గిర లేదంటావా?
“నా యూట్యూబ్ అకౌంట్ కి వెళ్లు”
ఈ డివైస్ లో యూట్యూబ్ సెటప్ లేదంటావా?
ఓహో! అది నువ్వు కాదు కదూ!
సర్లే-
ఇప్పుడు నిన్ను కాన్ ఫిగర్ చెయ్యలేను కానీ
“ఓకే, గూగుల్!
ప్లే కోయిల సౌండ్”
అయో…రామ!
కొయిలా బేర్ కాదమ్మా
కోయిల… కోకిల…కోకిలమ్మ…
మావి చిగుళ్లు మెత్తగా
నెమరువేస్తూ
అల చిటారు కొమ్మన
కులాసాగా కూచుని
ఉగాది వచ్చిందని
నిద్ర లేపుతుందే
మా పెరటి కోకిలమ్మ-
ఆ…ఓకే గూగుల్!
“కుకూ తియ్యని పాట”
“కుకూ పాటా”
“కుకూ సౌండ్”
ఏదోటి తగలెట్టు…
హమ్మయ్య-
యూట్యూబ్ పుణ్యమా అని
“కుకూ” సౌండ్తో తెల్లారే భాగ్యం కలిగింది
సమయానికి ఎవరో మహానుభావుడు
అప్ లోడ్ చేసి పెట్టేడు
హేయ్ సిరి!
పిల్లలని ఒక్కొక్కళ్ళని కాల్ చెయ్యి-
ఆ… ఏవర్రా!
తల స్నానాలు చేసేరా?
రాక రాక వీకెండ్ వచ్చినట్టు
ఆ మొద్దు నిద్రలేవిటి?
రాక రాక పండగ – వీకెండ్ వచ్చింది
అన్నట్లు ఏవండోయ్! ఇండియన్ స్టోర్ లో
సరుకులన్నీ దొరికేయా
కిందతేడాది కొబ్బరికాయ
పులుపు లేని హైబ్రిడ్ మామిడి కాయ
చలికి ఓ పట్టాన ముగ్గని అరటి పళ్లు
ఆర్గానిక్ పుట్నాల పప్పు
అట్ట కట్టిన
పురానా జమానా నాటి
చింత పండు
బ్రాన్ డెడ్ బెల్లం
అయొడైడ్ సాల్టు
థాయ్ మిరప కాయా
ఆ….
ఆ తెలుగు స్టోర్ వాళ్లు
ప్రసాదంగా ఇచ్చిన
రెండు ఎండిపోయిన
వేప పువ్వు రేకులు
…
ఊ…ఇంకేం కావాలీ?
అన్నీ ఉన్నట్లేనా?
ఓక్, గూగుల్!
“టెల్ మీ హౌ టు డూ ఉగాది పచ్చడి”
అదేలేమ్మా తల్లీ!
యూట్యూబు లోంచి
“ఉగాది పచ్చడి తయారీ”
హయ్యో రాత!
ఇది మా ఇంటి పచ్చడి కాదే!!
చిన్నప్పుడు
నాన్నని ఇంటిచుట్టూ
పరుగులెత్తించిన ఉగాది పచ్చడి
అమ్మ చేత్తో కలిపిన
ఉగాది పచ్చడి
అప్పుడు తినడానికి హడలు గొట్టించి
ఇప్పుడు కళ్లల్లో ఊరిస్తున్న
ఉగాది పచ్చడి
హేయ్ సిరి!
టీవీలో
ఇండియన్ ఛానెల్ నించి
పంచాంగ శ్రవణం
వినిపించు
”అయ్యో ఎలక్షన్ గోల కాదమ్మా”
పంచాంగం…
పంచాంగం…
మా నిన్న సాయంత్రం
ఇండియాలో ప్రసారం
అయ్యింది చూడూ!
పోన్లే ఇక చాలు
అలెక్సా!
ఒక పాట పాడు
బాగా నిద్రొస్తోంది
అదేలే అమెజాన్ మ్యూజిక్కో
ఐట్యూన్సో
యూట్యూబో
సావనో
నిద్దట్లోనైనా
ఉగాదిని ఊహించుకుంటాను
కళ్లల్లోంచి జారిపోయి
కలల్లో తడై మిగిలిపోయిన
ఉగాదిని తల్చుకుంటాను
*****
అఆలు (అనుభూతులు-ఆలోచనలు) 